HOUSE OF REPRESENTATIVES

BARAZA LA WAWAKILISHI

News from the House

Balozi wa Iran nchini Tanzania akutana na Spika wa Baraza la Wawakilishi

Balozi wa Iran nchini Tanzania Bwana Mousa Farhang, amesema kuwa mahusiano mazuri yaliyopo baina ya Iran na Zanzibar yanatokana na historia nzuri iliyopo baina ya nchi mbili hizo na kueleza kuwa ni dhahiri kuwa historia nzima ya Tanzania inabebwa na Zanzibar.

Balozi Farhan ameyasema hayo alipofanya ziara katika Afisi ya Baraza la Wawakilishi na kukutana na Spika wa Baraza hilo Mheshimiwa Zubeir Ali Maulid ambapo amesema kuwa, ni heshima ya kipekee kwa nchi yake kuwa na mahusiano mazuri ya kibunge na Zanzibar na kumuomba Spika kuyadumisha mahusino hayo ili nchi zote mbili ziweze kunufaika.

Aidha Balozi Farhang amesema kuwa lengo la ziara yake ni kuleta mualiko kwa Spika wa Baraza la Wawakilishi unaotoka kwa Spika wa Bunge la Iran wa kumtaka kuhudhuria katika sherehe za kumuapisha Rais wa Iran ambae amechaguliwa tena baada ya kufanyika kwa uchaguzi nchini humo.

 Katika sherehe hizo ambazo kiutaratibu huandaliwa na Bunge la Iran, viongozi wa mataifa mbali mbali duniani wanatarajiwa kuhudhuria na kushuhudia sherehe hizo ambazo ni za aina yake.

Pamoja na mualiko huo, Balozi Farhang pia amechukua fursa hiyo kumpongeza Spika wa Baraza la Wawakilishi Mheshimiwa Zubeir Ali Maulid kutokana na ushiriki wake katika mkutano wa Intifada uliokua na lengo la kuiunga mkono nchi ya Palestina katika mapambano yake.

Amesema kuwa kitendo hicho ni cha kupigiwa mfano kutokana na baadhi ya nchi za magharibi zinavyotumia fursa ya kuanzisha uhusiano na nchi za kiafrika ikiwemo Tanzania kwa lengo la kuanzisha tamaduni zao pamoja kuzisahaulisha nchi hizo malengo na misingi imara ya ukombozi iliyowekwa na waasisi wa mataifa hayo.

Hata hivyo, Balozi Farhang amesema kuwa nchi yake haina wasi wasi na Tanzania kutokana na misimamo yake katika ulimwengu wa Kimataifa ambaopo imekua ikionesha kutotetereka kwake katika masuala yanayosimamia haki.

Balozi Farhang amesema kuwa ushiriki wa Zanziba na Tanzania kwa ujumla katika mkutano wa Intifada, umetoa matumaini ya kuungwa mkono kwa nchi ya Palestina  katika kupiga vita ukandamizaji unaofanyika katika ardhi yao.

Nae Spika wa Baraza la Wawakilishi Mheshimiwa Zubeir Ali Maulid, amechukua nafasi hiyo kuupokea kwa heshima kubwa mualiko alioletewa na kusema kuwa Zanzibar itashiriki katika sherehe za kumuapisha Rais wa Iran. Mheshimiwa Zubeir aliendelea kutoa shukrani za pekee kwa nchi ya Iran kutokana na heshima kubwa aliyopewa aliposhiriki katika mkutano Intifada ambapo pamoja na mambo menngine alipewa nafasi ya kuendesha kikao hicho jambo ambalo limeipa hadhi na heshima kubwa Zanzibar katika ulimwengu wa kimataifa.

Aidha, Spika Zubeir amechukua nafasi hiyo kumuomba Balozi wa Iran nchini Tanzania kumfikishia salam zake za rambi rambi kwa Rais na wananchi wote wa Iran kutokana na uvamizi uliofanywa hivi karibuni katika Bunge la nchi hiyo ambapo magaidi walivamia Bunge hilo na kuuwa takriban watu kumi na saba.

Mheshimiwa Zubeir amesema kuwa kitendo hicho kiliwashitua wengi kutokana na matukio kama hayo kukoma katika nchi hiyo kwa takriban miaka kumi na mbili sasa, hivyo amekilaani na kukipiga vita kitendo hicho na kusema kuwa  matukio kama hayo hayavumiliki na ni vyema Serikali za nchi husika zikachukua hatua kali kwa wote wanaoshiriki katika matukio hayo.


Hon. Zubeir Ali Maulid (Speaker)

Upcoming Events

Stay connected